[powerpress]

Goeie môre vriende,

 

Wat ’n voorreg om vanoggend saam met julle te kuier vir ’n paar minute en saam te leer oor hoe ons die lewe beter kan doen.

 

Ons is steeds besig in ons Lent reeks en ons is op reis na Paasnaweek. Ek hoop die Lent boekie en die oefeninge elke dag beteken vir julle ook net so baie soos vir my. Die van julle wat ook vas in die tyd: ek hoop dat jy in daardie honger of dors God dieper ervaar en herinner word van jou reis saam met Hom.

 

Nou wie van, en asb. steek jou hand op ons is almal familie hier, is skuldig daaraan dat jy goed begin maar dit nooit klaar maak nie. Ek sien ’n paar vrouens hulle man in die sy slaan en sê steek op daai hand. Daar ma’s wat met groot oë na hulle kids kyk. Toemaar, ons almal is skuldig hieraan en ek gebruik die woord ons, want (en hou vas aan julle stoele) want ek self is ook skuldig hieraan. Ek weet julle sukkel om dit te glo dames en here maar dis waar my seuntjie en my vrou sal getuig dat ek ook lief is daarvoor om met iets te begin en dan dit vir later te los om klaar te maak. Die probleem is dat later kom net nooit.

 

Ek is mal daaroor om kos te maak en die projek aan te pak maar as ons klaar geëet het dan wil ek nie die projek afhandel deur skoon te maak nie. Swembad is ’n wonderlike ding jy kan swem en speel en ek love dit, maar om hom skoon te maak… ek sal môre en dan ek sal oormôre en dan los ek dit tot dit nie meer uitgestel kan word nie.

 

Ek is seker almal hier vanoggend kan hul hand opsteek. In ons lewens is daar ’n garage of ’n kamer of ’n kas of ’n vertrek wat klaar gemaak moet word maar elke dag of naweek val daar iets voor en ons sê môre of volgende naweek of die vakansie.

 

Die rede dat ek jou na die plek toe vat van goed wat nog nie klaar gemaak is nie, is omdat ons vandag gesels oor die 2de laaste woorde wat Jesus aan die kruis gesê het. En ons lees dit in Johannes 19:30

 

Nadat Jesus die suur wyn gekry het, het Hy gesê: “Dit is volbring!” (1983 vertaling)

 

 

Jesus het sy lippe en mond daarmee natgemaak. Hy sê toe: “Nou het Ek alles gedoen wat Ek moes doen.” Sy kop het vooroor geval en Hy het sy laaste asem uitgeblaas. (Boodskap)

 

When he had received the drink, Jesus said, “It is finished.” With that, he bowed his head and gave up his spirit.

 

Daar is baie emosie in hierdie woorde. Wanneer ons die woorde lees moet ons besef dit is nie woorde van opgee of verloor nie, dit is ’n statement wat Jesus maak. Dit is volbring, dit is afgehandel, die Engels se ‘it is finished’.

 

Al ooit ’n projek uiteindelik klaar gemaak wat baie tyd en energie gevat het en toe dit klaar was, wou jy net uitroep dit is volbring, dit is klaar, it is finished? Jy sê daardie woorde as woorde van oorwinning. Jy het jou doel bereik.

 

Vandag is die Ironman en wat jy sal opmerk as jy dalk vanmiddag by die wenstreep sal wees, al wen die persoon nie die ironman nie as hulle aan die einde oor daardie streep loop, kruip, draf, of rol – hulle gooi hulle arms in die lig asof hulle dit gewen het, maar eintlik is dit meer ’n statement van it is finished, dit is volbring, ek het alles gegee wat ek kon. Ek het my doel bereik.

 

Wat beteken dit dat dit volbring is vir jou en vir my? What is finished?

 

Die woord wat Jesus gesê het, is Tetelestai.

 

Dit beteken letterlik:  voltooi, betaal of selfs perfek.

Drie verskillende beelde kom na vore:

1. ’n Dienskneg wat na sy meester terugkeer en sê die werk wat ek moes doen, is klaar.
2. ’n Skuldeiser wat verklaar, die skuld is ten volle vereffen.
3. ’n Priester wat die lam ondersoek en sê: dit is perfek.

 

Net ’n interessante feit oor die woord ook: dis ’n woord wat verwys na aanhoudend. In Engels sê hulle dis continuous, dis nie net dat dit gebeur het nou nie, maar dit hou aan in die toekoms. Die skuld bly ten volle vereffen, die lam bly perfek, die werk is vir altyd klaar.

 

Die feit dat Jesus dit waarskynlik met ’n harde stem uitgeroep het – sê vir ons dat iets belangriks gedoen is.

 

Maar wat belangrik is gedoen?

 

Jesus voltooi Sy lewensmissie

 

Vriende, van dag 1 af wat Jesus op aarde was het Hy geweet dis waarvoor Hy gekom het, dis hoekom Hy op aarde is, is hierdie oomblik. Die hele Evangelie hang af van die moment. Al die profesieë en wat gesê is word nou vervul. Jou en my hoop, oorvloedige lewe, verlossing hang van daardie woorde af. Jesus maak klaar! Hy voltooi wat Hy begin het.

 

Johannes herinner ons veral daaraan op verskillende maniere.

Joh. 4:34   “My voedsel is om die wil te doen van Hom wat My gestuur het, en om sy werk te voltooi.”

So gaan dit aan en aan, regdeur die evangelies tot by die gebed wat Jesus bid in Joh. 17

Joh. 17:4   “Ek het U op die aarde verheerlik deur die werk te volbring wat U My gegee het om te doen.”

 

Jesus het verstaan waaroor sy lewe gegaan het en soos Hy aan die kruis hang en besef dat elke liewe profesie vervul is roep hy uit: dit is volbring.

 

Die groot nuus wat ek en jy moet besef is dat al het Jesus sy lewensmissie voltooi het ek en jy nog nie. En in hierdie tyd van Lent en die oploop na Paastyd is dit belangrik dat ons besef dat ek en jy het nog ’n taak om te voltooi, dat God my en jou op aarde geplaas het met ’n doel. Dat ek en jy Sy plan vir hierdie verlore wêreld is, dat ons armoede moet aanspreek, dat ons injustice moet aanspreek, dat ons moet opstaan vir die weduwees, die ou mensies, die weeskinders, dat ons liefde sal bring in ’n liefdelose of oppervlakkige liefdes-wêreld, dat ons hoop sal bring waar hopeloosheid heers dat ons lig sal wees waar donkerte heers. Dat ons ’n kerk sal wees waar almal welkom is en almal begelei sal word tot ’n dieper verhouding met God, hulleself, mekaar en ’n soekende wêreld daar buite.

 

Sal dit nie wonderlik wees as ek en jy dieselfde kan sê aan die einde van ons lewens nie? Tetelestai

 

Vriende, die ding wat ek die laaste tyd nogal mee journey is juis die vraag: Is ek besig om te groei in my lewensmissie en is ek nog besig om dit uit te leef en te vervul?

 

En dalk is dit ’n vraag wat jy dalk die volgende paar weke mee saam met God moet journey. Is ek besig met my lewensmissie, Here wat is daar in my lewe wat ek dalk begin het maar nie klaar gemaak het nie? Miskien moet jy besef dat jy nog nie eers begin het nie, en dis tyd om te begin.

 

In my reis het ek agtergekom dat ek ’n verhouding met God het en as Geestelike leier of Pastoor doen ek my takies en preek ek Sondae ens. maar dit het begin soos werk raak.

 

Iets wat ek moet doen en die jaar mee journey, is om dieper te gaan in my verhouding met God om weer sy kind te wees, Dieper te gaan in my rol as Pa vir Durandt, dieper te gaan in my rol as Man vir Chantal, dieper te gaan in vriendskappe maar ook dieper te gaan in verhouding met ’n wêreld daar buite vol nood.

 

Iets wat ek net agter kom is dat as ek en as jy regtig ons lewensmissie wil uitleef, as ons daardie woorde een dag wil uitskree Tetelestai, dit is voltooi, moet ek en jy begin om op te hou praat of te probeer. Ons het die greatste intensies en maak die greatste planne en ons probeer om tyd te kry of probeer om beter te doen; maar dit gebeur net nie. Maar is dit nie tyd vriende dat ons begin commit om te oefen aan hierdie dinge nie? Sodat ons dit kan begin doen.

 

Die realiteit is, maak nie saak hoe hard ek vandag sou probeer het om die Ironman te doen nie die probleem sou nie gewees het dat ek nie hard sou probeer het nie, die probleem sou wees dat ek nie geoefen het nie dis hoekom ek dit nie sou maak nie. Maar as ek vandag begin oefen om die Ironman te doen dan volgende jaar sal daar ’n groter kans wees om dit te kon doen, want ek het geoefen om dit te doen.

 

Is dit nie tyd dat ek en jy moet ophou probeer om nader aan God te leef, of ophou probeer om dieper verhoudings te leef, of ophou probeer om meer vrygewig te wees of ophou probeer om ’n beter pa of man te wees . Ons moet eerder begin om God te vra om ons te help om te commit om elke dag te oefen om nader aan hom te leef, te oefen om dieper verhoudings te leef, te oefen om meer vrygewig of oefen om ’n beter pa of man te wees nie. Om te oefen om ons lewensmissie te voltooi. Sodra ons begin oefen, begin goed gebeur…

 

Vriende wat is daar in jou lewe wat nog nie klaar gemaak is nie? Wat is daar wat jou keer om jou lewensmissie te voltooi?

 

Wie is daar wat jy dalk moet vergewe en vryspreek vandag?

Wie is daar wat jy moet gaan omverskoning vra vir jou optrede of dalk vir waar jy nie opgetree het toe jy nie moes nie?

Dalk is dit tyd dat jy die beheer van jou lewe oorgee aan Jesus.

Dalk is dit om weer tyd om committed aan jou huwelik te raak en weer moeite te doen en daaraan te werk.

Dalk is dit tyd om te erken jy het ’n verslawingsprobleem het en te gaan vir hulp.

Dalk is dit ’n besluit om van jou skuld aan te spreek en af te betaal.

Dalk is dit tyd om daai fluistering na te luister en daardie besluit om iets te doen wat jy al vir maande, dalk jare uitstel te doen.

Ek weet nie wat dit vir jou is nie.

 

En ek hoor jou vanoggend. Jy sê ek weet nie hoe ek dit gaan regkry nie.

Die antwoord is eenvoudig:  een tree op ’n slag.

Vra Hom en vertrou Hom om vir jou die eerste tree te wys. En weet jy wat, as jy daardie tree gegee het, sal die Here môre vir jou die 2de tree gee en dan die derde ens.

 

Want ek is so bly dat die Here nie soos ek is wat dinge begin en dan halfpad los nie.

 

Ons het vanoggend in die aanbidding met die vers Fillipense 1:6 stil geraak: “Ek is veral ook daarvan oortuig dat God, wat die goeie werk in julle begin het, dit end-uit sal voer en dit sal voleindig op die dag wanneer Christus Jesus kom.”

 

Ek is so bly dat wat God begin hy klaar maak.

 

Ek wil afsluit met die storie van John Aquari van Tanzania wat sy visier op die Olimpiese medalje in die maraton gesit het.

Halfpad deur die maraton het hy ’n ongeluk gehad en sy knie oop geval en sy knie van die plek waar dit moet wees verskuif.

Almal het besef hy sou nie die maraton kon klaarmaak nie, maar hy het aanhou hardloop tot hy heel laaste was.

 

Later het die stadion al leeg begin raak omdat al die atlete meer as ’n uur gelede al klaar was, toe John Aquari die wêreld geskok het.

Met sy beseerde knie, al kruppel-kruppel het hy die stadion binnegekom om sy laaste rondte voor die wenstreep klaar te maak.

 

Met ’n handdoek om die bloed wat gevloei het te keer het hierdie held die maraton klaargemaak toe seker al die ander sou opgegee het.

Toe hulle hom na die tyd vra hoekom hy aanhou hardloop het, het hy geantwoord: My land het my nie 5000 myl gestuur om die resies te begin nie, hulle het my gestuur om dit klaar te maak.

 

Vriende, God het ons nie na hierdie aarde toe gestuur om die resies te begin nie.

Hy het ons gestuur om dit klaar te maak.

Voltooi jou onklaar besigheid!  Maak ’n commitment vandag en doen dit.